12:36am|02Feb2012
Araaldaw akong minapuli samo.
Araaldaw nababanggihan maski minsan dae man dapat.
Asin sa lambang pagpuli,—tuyo man o dae—
napapatanaw sa bintana kan bus na araatsan marikas,
araatsan, mapundo ta papababaon ang mga pasaherong
nagmamadaling magpuli ta gutom o tungka.
Hihilingon ang panganuron
Minsan ni dae mapaaninag ang bulan.
Minsan nagtatago ang mga bituon.
Minsan sasabayan pang uran.
Ang lipot dara kang makusog na hagip kang duros
lalong nagsusurok sa kalamnan.
Di bale na; harani na man.
Mapapasirip na naman sa bintana ta tibaad makalampas.
Nuarin na man daw, sa pagpuli, ako saimong sasabayan?
